2025-жылдын 23-мартында Бишкек шаарында «Алтын түйүн» Улуттук балдар инженердик-техникалык академиясы жана Кыргыз Республикасынын Балдар фонду тарабынан уюштурулган кайрымдуулук шахмат турнири болуп өттү. Турнирдин негизги максаты – «Алтын түйүн» академиясынын бүтүрүүчүсү, Пирогов ат. НМИЦ студенти, жаш жана таланттуу дарыгер Айдар Анаркасовдун дарылануусу үчүн каражат топтоо болду.

Айдар кардиолог болуп, адамдардын өмүрүн сактоого өзүн арноону кыялданат, бирок учурда өзү оор кырдаалга туш болуп турат. Ага ашказандын 4-даражадагы рагы метастаздары деген диагноз коюлган. Дарыланууга Россияда чоң суммадагы каражат талап кылынгандыктан, анын достору, кесиптештери жана кайдыгер эмес адамдар аны колдоого алышты.

Турнирге 8 жаштан 89 жашка чейинки 56 катышуучу катышты. Алардын арасында жаңыдан ойной баштагандар да, тажрыйбалуу шахмат чеберлери да бар эле. Турнирдин жеңүүчүсү эл аралык мастер Марков Михаил болду. Экинчи орунду шахмат боюнча спорт чеберлигине талапкер Бекназаров Эмир ээлесе, үчүнчү-бешинчи орундарды Сыдыков Эрназар, Эсенбек у. Бакай жана Суркеев Шумкар бөлүштү. Ал эми алтынчы орун Кыргызстандын шахмат чемпиону, эл аралык арбитр Азиз Анварович Умарбековго ыйгарылды. Катышуучулардын жана уюштуруучулардын биргелешкен аракетинин натыйжасында 52 миң сом чогултулуп, Айдардын үй-бүлөсүнө тапшырылды.Бул турнир жөн гана мелдеш эмес, бул – чыныгы боорукерликтин жана колдоонун көрүнүшү. Катышкан, колдоо көрсөткөн жана каражат бөлгөн бардык инсандарга терең ыраазычылык билдиребиз. Биргеликте жакшылыктарды жасай алабыз!