15-апрелде «Алтын түйүн» академиясы менен Аль-Фараби атындагы Казак улуттук университетинин филиалы кызматташуу тууралуу келишимге кол коюшту.  Документке УИТБАнын директору Айбек Алмасбекович Алмасбеков жана филиалдын директору Жамин Орозбекович Шейшенов кол коюшуп, Кыргызстандагы жаштардын инженердик-техникалык билим берүү системасын өнүктүрүүдөгү жаңы баракты ачышты.

Бул кызматташтык – жаш муундун илим жана инновациялар жолунда өсүп-өнүгүүсүнө, тажрыйба топтоп, эксперимент жасоосуна шарт түзгөн натыйжалуу билим берүү чөйрөсүн түзүүгө карай маанилүү кадам. Технология бардык тармактарга тездик менен жайылтылып жаткан учурда, жаштарды изилдөө жана инженердик ишмердүүлүккө эрте жашынан тарта шыктандыруу өзгөчө мааниге ээ. Бул багытта «Алтын түйүн» академиясы жөндөмдүү окуучуларды таап, өнүктүрүүгө карай кадам жасаса, өзгөчө ролго ээ болот. КазУнун филиалы ошол жаш таланттарды тереңдетип окутууга керектүү илимий жана методикалык базаны камсыздайт.

Кызматташтык тууралуу келишимдин алкагында биргелешкен билим берүү жана агартуу долбоорлору, илимий иш-чаралар, тематикалык сынактар, биргелешкен программалар жана кесиптик тажрыйба алмашуу иштери жүргүзүлөт. Мунун баары жаштарга билим гана эмес, өзүн таанып-билүү жана ишке ашыруу үчүн чыныгы мүмкүнчүлүктөрдү түзүп берет.

Мындай өз ара аракеттенүү мектеп менен жогорку билим берүү системасынын байланышын бекемдеп, теория менен практиканын ортосундагы ажырымды жоюуга өбөлгө түзөт. Эң башкысы — келечекте заманбап көйгөйлөрдү чече ала турган жаңы муундагы адистердин калыптанышына жардам берет.

Ушундай өнөктөштүктүн аркасында инженердик жана илимий кесиптердин аброю жогорулап, ойлоп табуучулук жана техникалык чыгармачылыкка кызыгуу артып, билим берүү чөйрөсү чыныгы шыктанууну жаратуучу жана практикага багытталган мүнөзгө ээ болууда!